Ho tlaleha liphoso le bothata ke mohato oa ho ntlafatsa boleng ba phano ea litšebeletso ekasitana le ho tsebisa setsi se fanang ka litšebeletso ho lokisa bothata ka nako. Ho tlaleha ho boela hape ho boloka polokeho ea basebelisi ba litšebeletso kaha bothata bo hlokomeloa kapele.
Tlaleho ea liphoso bosebeletsing e tsoela molemo litsi tse fanang ka litšebeletso ekasitana le basebelisi ba litšebeletso. Tlaleho ena ea litšebeletso e boela e thusa litsi tse fanang ka litšebeletso ho ithuta ka liphoso tse tlalehoang hangata ekasitana le ho fana ka tharollo ea moshoelella holima liphoso tse joalo. Ka lehlakoreng le leng, tlaleho ea liphoso e khona ho hloaea moo ntlafalo ea bosebeletsi e leng teng.
Tokiso ea marang-rang a motlakase.
Litokomane tsa Phano ea Boleng bo Tsoileng Matsoho ba Litšebeletso ea 2008 le 2013 bakeng samotlakase, metsi metseng ea litoropo le litšebeletso tsa likhoerekhoere (Quality of Service and Supply Standards), li fana ka tataiso ea maemo le nako eo tharollo ea litšebeletso e lokelang ho etsoa ka eona.
Ho latela tšebetso e ntle, litsi tse fanang ka litšebeletso li lokela ho tsebisa basebelisi ba litšebeletso ka morero oa tokiso ea marang-rang a litšebeletso, e le hore basebelisi ba sebelise mekhoa e meng e ka fumanehang bakeng sa ha tokiso e ntse e phetheloa. Ka tsela etšoanang, ha litsi li thulanale ho khaoha hoa phepelo e sa reroang, li ntse li lokela ho khutlisa litšebeletso ka har’a nako e boletsoeng ka tokomaneng ea QoSSS.
QoSSS ke tokomane e hlahisitsoeng ke Lekhotla la Taolo ea Motlakase le Metsi Lesotho (LEWA), ka kopanelo le bafani ba litšebeletso, eo har’a tse ling, litsi tse boliseng ba Lekhotla li lokelang ho ikamahanya le meoloane ea tšebeliso ea marangrang a tlaleho ea liphoso. Marang-rang ana a tlaleho ea liphoso a lokela ho fana ka nomoro ea tlaleho le ho fumaneha mehaleng ea moo litletlebo li lebisoang teng. Nomoro ea tlaleho e fana ka bopaki ba tlaleho e entsoeng le ho hlalosa mofuta oa tletlebo e joalo. Boemong boo phoso e nkang ho feta libeke tse peli e sa rarolloe ke sitsi se boliseng ba LEWA, mosebelisi oa litšebeletso o khothaletsoa ho isa tletlebo e joalo ho LEWA bakeng sa tharollo.
LEWA e boetse e lisa tšebetso ea litsi tsena ka litlaleho tsa khoeli le khoeli e le ho netefatsa hore efela li ikobela meoloane e behiloeng. Basebelisi ba litšebeletso ba eletsoa ho tlaleha liphoso litsing tse fanang ka litšebeletso ka mekhoa e teng ea khokahano. Basebelisi ba litšebeletso tsa K’hamphani ea Motlakase Lesotho (LEC) ba ka teka liphoso ka mohala ho (+266) 800 22 000 le ka WhatsApp ho (+266) 6227 4000. Ha basebelisi ba litšebeletso tsa K’hamphani ea Metsi le Likhoerekhoere (WASCO), ba ka tlaleha liphoso ka mohala ho (+266) 22 262 120, (+266) 800 22 011 le ka WhatsApp ho (+266) 5700 0365.
