Nakong ena eo lefatše le tjametsoeng ke mathata a tšilafalo ea tikoloho ekasitana le litlamorao tsa teng, lefatše le linaha li lemohile hore tšebeliso ea matla a inchafatsang ke tharollo ea moshoelella. Sena se boetse se bontša hore lefatše le kholisehile hore ha ho mohato o mong o molemo ntlheng ea ho hlokomela tikoloho ntle le tšebeliso e nepahetseng ea lihloliloeng molemong oa lona. E meng ea melemo ea ho sebelisa matla a inchafatsang ke e latelang:
Tlhokomelo ea tikoloho: Se seng sa litšiea tsa tšebeliso ea mofuta oa matla a inchafatsang ke bokhoni ba ho theola sekhahla sa tšilafalo ea tikoloho le pheto-phetoho ea leholimo. Matla a inchafatsang joaloka a letsatsi, metsi le moea a ka sebelisoa ho hlahisa motlakase ntle le ho silafatsa tikoloho ka likhase tse tsoelang moeeng. Ka tšebeliso ea matla ana a inchafatsang, ho ka bolokoa tlholeho molemong oa meloko e tlang.
Ho itšematlela hoa tikoloho: Tšebeliso ea matla a inchafatsang e bohlokoa bakeng sa ho itšematlela hoa tikoloho khahlanong le maemo a mabe a leholimo. Matlapa a hlahisang motlakase oa letsatsi, a khona ho itšematlela khahlanong le maemo a mabe a leholimo joaloka lifefo ho latela sebopeho sa ona.
Boikemelo phepelong ea motlakase: Ka ho sebelisa matla a inchafatsang, naha e eketsa bongata ba motlakase oa lehae. Ho ba le motlakase o lekaneng, ho ka fokotsa ho kena-kenana hoa linaha tse nang le motlakase o mongata.Ho tsetela ho tlhahiso ea motlakase oa lehae e ka ba mohato o ka tlisang kholo le ntlafalo, keketso ea mesebetsi le ho akofisa boqapi litabeng tsa tšebeliso ea marang-rang.
Litjeo tse tlaase: Liphuputso li bontšitse hore, papisong le mekhoa e tloaelehileng ea ho fehla motlakase, ho fehla motlakase ka matla a inchafatsang ho litjeo li tlaase. Tsena li tlisitsoe ke khatelo-pele ea mekhoa ea sejoalejoale ea ho sebetsa le tšebeliso e ntseng e ata ea matla a inchafatsang.
Bophelo bo botle: Tšebeliso ea matla a inchafatsang e bohlokoa ntlafatsong ea boiketlo le bophelo bo botle. Mekhoa ea khale ea tlhahiso ea motlakase e silafatsa tikoloho ka likhase tse tsoelang moeeng. Sena se bolela hore phokotso ea tšebeliso ea ona, e ka thusa ho fokotsa tšilafalo ea moea le tikoloho ‘me sena se ka etsa hore bophelo ba batho bo ntlafale.
Tiiso ea maqhama: Tšebeliso ea matla a inchafatsang e hloka ho kopaneloa ke lichaba tsohle kaha e le bothata bo amang lefatše lohle. Kopanelo ena e tla thusa hore ho thakelanoe ka malebela a tšebetso le mahlale, e leng lintho tse ka thusang ho akofisa tšebeliso ea matla a inchafatsang lefatše lohle.
Ho thula ka phatla mathata ana a tjametseng lefatše ka tšilafalo ea tikoloho bakeng sa bokamoso bo botle boo linaha tsohle li bo laba-labelang, ha ho thuse feela hore tikoloho e hloeke, moruo o thuthuhe ekasitana le ntlafalo ea bophelo bo botle, ho boela hape ho bohlokoa tlhoekisong ea lefatše, molemong oa bokamoso bo botle boo bohle re bo laba-labelang.
Lesotho mona ke bonyane malapa a linoko li 47 lekholong (47%) a nang le khokelo ea motlakase, ‘me boholo ba ona a metseng ea litoropo. ‘Muso oa Lesotho ha o oa fihlela sepheo sa ho eketsa kanetso ea motlakase malapeng ka linoko tse 75 lekholong (75%) ka selemo sa 2022. Naha e hloaile motlakase o hlahisoang ka metsi, moea le letsatsi e le ona mokhoa ho fihlela sepheo sena. ‘Muso o bile o tsoile letšolo ho fereha bo ramatsete ho tla o thusa ho fihlela sepheo.
Joalo ka letsoho la ‘muso ho kenya leano la ona tšebetsong, Lekhotla le abetse Generation Licence ho Lesotho Electricity Generation Company (LEGCO) lengolo la tumello ea tšebetso la lilemo tse 30 ho fehla motlakase oa 30 MW Ha Ramarothole seterekeng sa Mafeteng. Lekhotla le bile la eketsa lengolo la tumello ea tšebetso la NEO 1 ho itukisetsa ho fehla motlakase oa 20 MW hona Ha Ramarole, Mafeteng. Ho feta mona, Lekhotla le fane ka mangolo a tumello ea tšebetso tlasa lipehelo tse khethehileng ho setsi sa Sekolo se Seholo sa Sechaba (National University of Lesotho – Energy Research Centre), Mos-Sun Clean Energy Technologies le Technologies for Economic Development ho fehla motlakase libakeng tsa Motete le Linakeng molemong oa sechaba sa metse eo.
